ഇൻസ്റ്റഗ്രാമിലൂടെ പരിചയപ്പെട്ട യുവതിയിൽനിന്ന് ആറുപവൻ കൈക്കലാക്കി, യുവതിയെ വീട്ടിൽ വിളിച്ചുവരുത്തി ദേഹോപദ്രവം ചെയ്തു; വീണ്ടും അകത്തായി റീൽസിലെ മീശ വിനീത്
തിരുവനന്തപുരം: സ്വർണാഭരണങ്ങൾ കൈക്കലാക്കിയശേഷം യുവതിയെ വിളിച്ചുവരുത്തി ദേഹോപദ്രവം ഏൽപ്പിച്ചെന്ന കേസിൽ ഇൻസ്റ്റഗ്രാം റീൽസ് താരം കസ്റ്റഡിയിൽ. കിളിമാനൂർ വെള്ളല്ലൂർ സ്വദേശിയായ ‘മീശ വിനീത്’ എന്ന വിനീതി(26)നെയാണ് യുവതിയുടെ പരാതിയിൽ കിളിമാനൂർ പോലീസ് പിടികൂടിയത്. നേരത്തെ പീഡനക്കേസിലും കവർച്ചാക്കേസിലും പോലീസിന്റെ പിടിയിലായി കുപ്രസിദ്ധി നേടിയ ആളാണ് മീശ വിനീത്.
ടിക് ടോക് വീഡിയോകളിലൂടെയാണ് വിനീത് സാമൂഹികമാധ്യമങ്ങളിൽ ശ്രദ്ധിക്കപ്പെടുന്നത്. ടിക് ടോക് നിരോധനത്തിന് ശേഷം ഇൻസ്റ്റഗ്രാമിലേക്ക് ചുവടുമാറ്റിയ ഇയാൾ റീൽസുകളിലും സജീവമായിരുന്നു. നേരത്തെ അഞ്ചുലക്ഷത്തോളം ഫോളോവേഴ്‌സുണ്ടായിരുന്ന വിനീത്, പീഡനക്കേസിൽ ഉൾപ്പെട്ടതിന് പിന്നാലെ തന്റെ പ്രധാന ഇൻസ്റ്റഗ്രാം ഐ.ഡി. ഡിലീറ്റ് ചെയ്തിരുന്നു. ഇയാളുടെ ഫോളോവേഴ്‌സിൽ കൂടുതൽപേരും പെൺകുട്ടികളും യുവതികളുമായിരുന്നു. നിലവിൽ പുതിയ ഐ.ഡി.യിൽ മുപ്പതിനായിരത്തിലേറെ ഫോളോവേഴ്‌സാണ് ഇയാൾക്കുള്ളത്.
