ഞങ്ങളുടെ ലവ് മാര്യേജ് ആയിരുന്നു, ഞാൻ ഇങ്ങനെ ആയതുകൊണ്ട് കുഞ്ഞിന് എന്തെങ്കിലും കുറവുകൾ ഉണ്ടാകുമോ എന്ന ഭയം അലട്ടി, പക്ഷെ ദൈവം കൂടെത്തന്നെ നിന്നു: മഞ്ജു രാഘവ്

മലയാള സിനിമയിലെ ആദ്യത്തെ പൊക്കം കുറഞ്ഞ നായികയാണ് മഞ്ജു രാഘവ്. മൂന്നര എന്ന ചിത്രമാണ് മഞ്ജു രാഘവിന്റെ ആദ്യ സിനിമ. സിനിമ, മോഡലിംഗ്, സ്പോർട്സ്, നൃത്തം തുടങ്ങി വിവിധ മേഖലകളിൽ മികവ് തെളിയിച്ച മഞ്ജു മലയാളി മനസുകളിൽ വളരെ പെട്ടന്ന് തന്നെ ഇടം പിടിക്കുകയായിരുന്നു. പാലക്കാട്ടുകാരിയായ മഞ്ജു വിവാഹം കഴിച്ചത് അത്താലൂർ സ്വദേശി വിനുവിനെയാണ്.

ആറുവര്ഷത്തോളം നീണ്ട പ്രണയത്തിനൊടുവിലാണ് ഇരുവരും വിവാഹിതരായത്. അടുത്തിടെയാണ് ഇരുവർക്കും ഒരു മകൾ ജനിക്കുന്നത്. ഗര്ഭകാലഘട്ടവും പോസ്റ്റ്പാർട്ടം ഡിപ്രഷനും അതിജീവിച്ച കഥ പറയുകയാണ് ഇപ്പോൾ മഞ്ജു.

നമ്മളുടേത് ലവ് മാര്യേജ് ആയിരുന്നു. ആറുവര്ഷത്തോളം പ്രണയം ആയിരുന്നു അതിനുശേഷം ആയിരുന്നു വിവാഹം. ആദ്യമൊക്കെ വീട്ടിൽ എതിർപ്പ് ഉണ്ടായിരുന്നു. ഇപ്പോൾ അതെല്ലാം സോൾവ് ആയി. മഞ്ജുവിന്റെ പ്രസവകാലം കുറച്ച് കോമ്പ്ലിക്കേറ്റഡ് ആയിരുന്നു. തൈറോയിഡ് ഒക്കെ ഉണ്ടായിരുന്നു, ആദ്യം ഒക്കെ ഇപ്പോൾ ഗർഭിണി ആകരുത് എന്നാണ് ഡോക്ടർമാർ പറഞ്ഞത്. പക്ഷെ മരുന്നൊക്കെ കഴിച്ചു, വേഗം തന്നെ ക്യാരി ചെയ്തു. കുഞ്ഞുവേണം എന്ന ചിന്ത വന്നപ്പോൾ തന്നെ ഒരു ടെൻഷൻ ഉണ്ടായിരുന്നു. പക്ഷെ ഡോക്ടർമാർ നല്ല സപ്പോർട്ട് ആയിരുന്നു.

കുഞ്ഞുണ്ടാകും എന്ന പ്രതീക്ഷ ഒന്നും ഉണ്ടായിരുന്നില്ല. ദൈവം തന്നതാണ് അത് നമ്മൾ സ്വീകരിച്ചു. ആദ്യമൊന്നും ഗർഭിണി ആണെന്ന് പോലും തോന്നിയിട്ടില്ല. ഒരു സിംപ്റ്റവും ഉണ്ടായിരുന്നില്ല. സിസേറിയൻ ആയിരുന്നു. ആ സമയം ഒക്കെ എനിക്ക് എന്റെ മനസ്സിൽ ഫുൾ നെഗറ്റിവ് ആയിരുന്നു. ഞാൻ ഇങ്ങനെ ആയതുകൊണ്ട് കുഞ്ഞിന് എന്തെങ്കിലും കുറവുകൾ ഉണ്ടാകുമോ എന്നായിരുന്നു ഭയം മുഴുവൻ. പക്ഷെ ദൈവം കൂടെത്തന്നെ നിന്നു. എന്നാൽ പ്രസവം കഴിഞ്ഞശേഷവും വിഷയങ്ങൾ ഉണ്ടായി.

ആദ്യ ഇരുപത് ദിവസത്തോളം എനിക്ക് എന്നോട് തന്നെ വെറുപ്പ് ആയിരുന്നു. കുഞ്ഞിനോട് പോലും അറ്റാച്ച്മെന്റ് ഇല്ലാത്ത അവസ്ഥ . വേദനകൊണ്ടാണോ എന്തോ എന്ന് എനിക്ക് അറിയില്ല. പിന്നെ ഒരു 28 ഒക്കെ കഴിഞ്ഞപ്പോഴാണ് ഞാൻ നോർമൽ ആയി വന്നത്. പോസ്റ്റ്പാർട്ടം ഡിപ്രെഷൻ ആയിരിക്കും. ഞാൻ അത് എന്റെ അനുജത്തിയോട് പറഞ്ഞിരുന്നു. അവളാണ് ഇക്കാര്യം എന്നോട് പറയുന്നത്.

പക്ഷെ എല്ലാവരും എനിക്ക് ധൈര്യം തന്നുകൂടെ തന്നെ നിന്നു. മുലപ്പാൽ കമ്മി ആയിരുന്നു, പൊടിയൊക്കെ ആണ് കുഞ്ഞിന് കൊടുത്തുകൊണ്ടിരുന്നത്. അപ്പോൾ എല്ലാത്തിന്റെയും ടെൻഷൻ എന്നെ അലട്ടി എന്നതാണ് വാസ്തവം. ഭർത്താവിന്റെ കുടുംബം മുഴുവനും നല്ല പിന്തുണ ആയിരുന്നു.