Keralafox

മലയാളികളുടെ പ്രിയപ്പെട്ട നടനായ ഉണ്ണിമുകുന്ദൻ ബിജെപി സ്ഥാനാർഥിയായി മത്സരിക്കാൻ ഒരുങ്ങുന്നു എന്ന തരത്തിലുള്ള വാർത്ത കഴിഞ്ഞ ദിവസമാണ് സാമൂഹ്യ മാധ്യമങ്ങളിൽ പ്രചരിച്ചത്. അടുത്ത ലോകസഭാ തിരഞ്ഞെടുപ്പിൽ പാലക്കാട് നിന്നുള്ള ബിജെപി സ്ഥാനാർത്ഥിയായിട്ടായിരിക്കും ഉണ്ണിമുകുന്ദൻ മത്സരിക്കുക എന്ന വാർത്തയായിരുന്നു ഇന്നലെ മുതൽ സോഷ്യൽ മീഡിയയിൽ നിറഞ്ഞത്. ഇപ്പോഴിതാ ഈ വിഷയത്തിൽ തന്റെ പ്രതികരണം അറിയിച്ചു കൊണ്ട് രംഗത്ത് എത്തിയിരിക്കുകയാണ് ഉണ്ണി മുകുന്ദൻ. പ്രചരിക്കുന്ന വാർത്തകൾ എല്ലാം വ്യാജ വാർത്തയാണെന്നാണ് ഉണ്ണി മുകുന്ദൻ തന്റെ സാമൂഹ്യ മാധ്യമത്തിലെ അക്കൗണ്ടിലൂടെ അറിയിച്ചിരിക്കുന്നത്.

ഇപ്പോൾ താൻ സിനിമ ചിത്രീകരണത്തിന്റെ തിരക്കിലാണെന്നും പ്രചരിക്കുന്ന വാർത്ത സത്യമല്ലെന്നും താരം പറഞ്ഞു.”രാഷ്ട്രീയത്തിലേക്ക് ഞാൻ വരുന്നു എന്ന തരത്തിലുള്ള വാർത്തകൾ ശ്രദ്ധയിൽപ്പെട്ടു. എന്നാൽ ആ വാർത്തകൾ എല്ലാം വ്യാജമാണ്. ഞാൻ ഇപ്പോൾ പുതിയ സിനിമയായ “ഗന്ധർവ്വ ജൂനിയറി”ന്റെ തിരക്കിലാണ്. വലിയ ഷെഡ്യൂൾ ആണ്. വഴിയെ തന്നെ കൂടുതൽ വിവരങ്ങൾ അറിയിക്കാം. മാധ്യമ സ്ഥാപനങ്ങളോട് ഇത്തരം വാർത്തകൾ പ്രസിദ്ധീകരിക്കുന്നതിന് മുൻപ് അതിൻറെ നിജസ്ഥിതി പരിശോധിക്കണമെന്ന് അഭ്യർത്ഥിക്കുന്നു. രാഷ്ട്രീയവും രാഷ്ട്രീയക്കാരും നേരിട്ട് സമൂഹത്തിൽ ഉണ്ടാക്കുന്ന സ്വാധീനത്തെ കുറിച്ച് നല്ല ബോധ്യമുള്ളതുകൊണ്ട് അവരോട് എന്നും ബഹുമാനമാണ്.

നിസ്സാരമായി ഞാൻ രാഷ്ട്രീയ പ്രവർത്തനത്തെ കാണുന്നില്ല.”-ഇതായിരുന്നു ഉണ്ണിമുകുന്ദൻ സാമൂഹ്യ മാധ്യമത്തിൽ കുറിച്ച്. എപ്പോഴും സാമൂഹ്യ മാധ്യമങ്ങളിൽ ഉണ്ണിമുകുന്ദൻറെ രാഷ്ട്രീയത്തെക്കുറിച്ച് വലിയ ചർച്ചകൾ നടക്കാറുണ്ട്. ഈ വർഷം ആദ്യം മുതൽ തന്നെ ബിജെപിയുടെ ചില പൊതുപരിപാടികളിൽ താരം പങ്കെടുത്തിട്ടുണ്ട്. അത്തരം കാര്യങ്ങളെല്ലാം കൂട്ടിച്ചേർത്താണ് ബിജെപിയുടെ സ്ഥാനാർത്ഥിയായി ഉണ്ണിമുകുന്ദൻ എത്തുന്നു എന്ന തരത്തിലുള്ള വാർത്തകൾ ഉണ്ടാക്കിയതെന്ന് യാതൊരുവിധ സംശയവുമില്ലാതെ നമുക്ക് പറയാം. എന്തുതന്നെയായാലും താരത്തിന്റെ രാഷ്ട്രീയ പ്രവേശനം കാത്തിരിക്കുകയാണ് ആരാധകർ.