Keralafox

കേരളത്തിലെ ആശുപത്രികൾ ഒക്കെ ഹൈടെക് ആകുന്നു എന്ന് പറയുമ്പോൾ തന്നെ ചില സർക്കാർ ആശുപത്രികൾ ഇന്നും പ്രവർത്തിക്കുന്നത് വളരെ പരിതാപകരമായ അവസ്ഥയിലാണെന്ന് തെളിയിക്കുന്ന ഒരു ഫേസ്ബുക്ക് പോസ്റ്റ് ആണ് ഇപ്പോൾ സോഷ്യൽ മീഡിയയിൽ ഇടം നേടുന്നത്. നിലമ്പൂർ സർക്കാർ ആശുപത്രിയിലെ പ്രസവാർഡിന്റെ അവസ്ഥയാണ് സിന്ധു സൂരജ് എന്ന ആളുടെ ഫേസ്ബുക്ക് പോസ്റ്റിലൂടെ നിറയുന്നത്. ഫേസ്ബുക്ക് പോസ്റ്റിന്റെ പൂർണ്ണരൂപം ഇങ്ങനെ.. ഞാനിത് എഴുതുന്നത് നിലമ്പൂർ ഗവൺമെൻറ് ആശുപത്രിയുടെ പ്രസവ വാർഡിൽ നിന്നുകൊണ്ടാണ്. പ്രസവ വാർഡ് എന്നതിനപ്പുറം ഇതൊരു നരകവാർഡ് എന്ന് വിളിക്കാനാണ് തോന്നുന്നത്. ഒരാൾക്ക് തന്നെ തിരിഞ്ഞും മറിഞ്ഞും കിടക്കാൻ കഷ്ടപ്പെടുന്ന ബെഡിൽ വലിയ വയറും കൊണ്ട് ഇടത്തോട്ടും വലത്തോട്ടും ചെരിഞ്ഞു കിടക്കുന്നത് രണ്ട് ഗർഭിണികൾ. ആകെയുള്ളത് 14 ബെഡ്. അതിൽ രണ്ടെണ്ണം എസ് സി എസ് ടി സംവരണ ബെഡ്.

ഇന്നലെ മാത്രം ഇവിടേക്ക് വന്നതാകട്ടെ 35 അഡ്മിഷൻ. അതിൽ 90% വും പൂർണ്ണ ഗർഭിണികൾ. വേദന തുടങ്ങിയവരും ഓപ്പറേഷൻ ഉള്ളവരും വെള്ളം പോയി തുടങ്ങിയവരും അങ്ങനെ പോകുന്നു ആ നീണ്ട നിര. അങ്ങനെ വേദനയോടെ പരകോടി താങ്ങുന്നവർ നിലത്തു പോലും പാവിരിച്ചു കിടക്കാൻ ഇടമില്ലാത്ത അവസ്ഥയിൽ പരിമിതമായ സാഹചര്യത്തിൽ അതീവ ശ്രദ്ധയോടെ ചെയ്യേണ്ട കാര്യങ്ങൾ ചുരുക്കുന്നു. ജീവനക്കാർ, നേഴ്സുമാരെയൊക്കെ രണ്ടു കൈകൊണ്ട് തൊഴണം. പ്രസവിക്കാനുള്ള വരും പ്രസവിച്ചു കഴിഞ്ഞവരും ഓപ്പറേഷനുള്ള വരും ഓപ്പറേഷൻ കഴിഞ്ഞവരും ഒക്കെ ഈ കുഞ്ഞു കെട്ടിടത്തിനുള്ളിൽ തിങ്ങിനിറഞ്ഞു കിടക്കുന്നു. വയറു കഴുകിയവരും ഓപ്പറേഷൻ കഴിഞ്ഞവരും കക്കൂസിൽ പോകുന്ന നരകമാണ് സഹിക്കാനാകാത്തത്.

ആകെക്കൂടി മൂന്നു കക്കൂസുകൾ മാത്രം. അതിൽ ഒരെണ്ണം യൂറോപ്യൻ ക്ലോസറ്റ്. ഇത്രയും സ്ത്രീകൾ പ്രസവിക്കാനായി വെറും രണ്ടേ രണ്ട് ടേബിൾ മാത്രം. ഇന്നലെ രാത്രി സിസ്റ്റർ പറയുന്നത് കേട്ടു. ആരും നടന് വേദനയൊന്നും ഉണ്ടാകേണ്ട വേദന വന്നവർ ഒന്ന് പ്രസവിച്ചു തീരട്ടെ ഗതിയില്ലെങ്കിൽ മഞ്ചേരിക്ക് വിടേണ്ടി വരുമെന്ന്. അവരെ കുറ്റം പറയാൻ പറ്റില്ല. മൂന്നോ നാലോ പേർ ഒരുമിച്ച് പ്രസവിക്കേണ്ടി വന്നാൽ എന്തു ചെയ്യും. നിസ്സഹായരായി നോക്കിനിൽക്കാൻ മാത്രമേ അവർക്ക് കഴിയൂ. വേദനയും ബ്ലീഡിങ് കൊണ്ട് നിവർന്നു നിൽക്കാൻ പോലും കഴിയാത്ത അവസ്ഥയിൽ ഗർഭിണികൾ നിൽക്കുമ്പോഴും ഇവരെ നോക്കി പുച്ഛത്തോടെ തലയാട്ടുകയാണ് തൊട്ടപ്പുറത്ത് പകുതി പണി കഴിഞ്ഞു കിടക്കുന്ന വലിയ കെട്ടിടം.