Keralafox

നടനും തിരക്കഥാകൃത്തുമായ ശ്രീനിവാസനെന്ന അതുല്യ പ്രതിഭ മലയാള സിനിമക്ക് നൽകിയ സംഭാവനകൾ ഒട്ടും ചെറുതല്ല. ഹാസ്യ കഥാപാത്രങ്ങളിലൂടെ മലയാളികളെ പൊട്ടിചിരിപ്പിച്ചും സീരിയസ് വേഷപ്പകർച്ചകളിലൂടെ പ്രേക്ഷകരെ കരയിപ്പിച്ചും അത്ഭുതപ്പെടുത്തിയും സ്‌ക്രീനിൽ നിറഞ്ഞാടിയിരുന്ന ഒരു കാലം ശ്രീനിവാസനുണ്ടായിരുന്നു. എന്നാൽ ഇന്ന് പല ആരോഗ്യപ്രശ്ങ്ങളാലും അദ്ദേഹത്തിന് സിനിമയിൽ സജീവമാകാൻ സാധിക്കുന്നില്ല. ഇപ്പോഴിതാ താൻ ദൈവ വിശ്വാസി അല്ല എന്നും വിധിയിലും വിശ്വാസമില്ല, നിമിത്തങ്ങളിലാണ് വിശ്വസിക്കുന്നതെന്നും പറഞ്ഞ അദ്ദേഹത്തിൻ്റെ വാക്കുകളാണ് ശ്രദ്ധേയമാകുന്നത്. അതേസമയം രാഷ്ട്രീയക്കാർ എല്ലാം ഒരേ പോലെയാണ് എന്നും പിണറായി വിജയനുമായി ആത്മബന്ധം ഉണ്ടായിരുന്നുവെന്നും നടൻ പറയുന്നു.

ശ്രീനിവാസന്റെ വാക്കുകൾ:

വിധിയിൽ വിശ്വസിക്കണ്ട. വിധിയിൽ വിശ്വസിച്ചില്ല എങ്കിലും കാര്യങ്ങൾ നടന്നു കൊണ്ടേ ഇരിക്കും. പിന്നെ എന്തിനാണ് വിധിയിൽ വിശ്വസിക്കുന്നത്. നമ്മൾ വിചാരിക്കുന്ന പോലെയല്ല ഒരു കാര്യങ്ങളും നടക്കുന്നത് അതല്ലേ വിധി. കഥ പറയുമ്പോൾ സിനിമയിൽ ഒക്കെ മമ്മൂട്ടി നിമിത്തങ്ങളെ കുറിച്ച് സംസാരിക്കുന്നുണ്ട്. അത് തന്നെ ആണ് എൻ്റെയും ജീവിതത്തിൽ, നിമിത്തങ്ങൾ ആണ്. വിധി ആണോന്നു എനിക്ക് അറിയില്ല-ഇന്ത്യൻ എക്സ്പ്രസിന് നൽകിയ അഭിമുഖത്തിൽ ശ്രീനിവാസൻ പറയുന്നു. ഞാൻ ദൈവത്തിൽ വിശ്വസിക്കുന്നില്ല, വിശ്വസിക്കാൻ പാകത്തിനുള്ള ദൈവങ്ങൾ ഒന്നും എൻ്റെ മുൻപിൽ വന്നിട്ടില്ല. അതാണ് പ്രശ്നം. ദൈവം ഉണ്ടോ ഇല്ലയോ എന്നൊന്നും എനിക്ക് അറിയില്ല, ദൈവം ഇല്ലാതെ ഇരിക്കുന്നതാണ് അദ്ദേഹത്തിന് നല്ലത് എന്ന് ഒരു തത്വ ചിന്തകൻ പറഞ്ഞിട്ടുണ്ട്. അത് തന്നെയാണ് ഞാനും പറയുന്നത്. അങ്ങനെ ഒരാൾ ഇല്ലാതിരിക്കുന്നതാണ് ദൈവത്തിനു നല്ലത്.

എൻ്റെ അച്ഛൻ കമ്മ്യൂണിസ്റ്റ്കാരൻ ആയിരുന്നു. ചെറുപ്പം മുതലേ കേട്ട് വളർന്ന മുദ്രാവാക്യം, ചെങ്കൊടി തൊട്ടു കളിക്കേണ്ട അത് ചന്ദ്രനിൽ എത്തിയ കൊടിയാണ്. അദ്ദേഹം കമ്മ്യൂണിസ്റ്റ്കാരൻ ആയതുകൊണ്ടും ഞാനും ചേട്ടനും ആ പാത പിന്തുടർന്നു. എന്നാൽ എന്താണ് കമ്മ്യൂണിസ്റ്റ് കോൺഗ്രസ്സ് എന്നൊന്നും അപ്പോൾ എനിയ്ക്ക് അറിയില്ല. അറിയാത്ത പ്രായത്തിൽ തുടങ്ങിയതാണ്. വർഷങ്ങൾക്ക് ശേഷം പിണറായി വിജയൻ എന്നോട് പറഞ്ഞിട്ടുണ്ട് എൻ്റെ അച്ഛനെ അറിയാമായിരുന്നു എന്ന്. ഞാൻ സിനിമയിൽ നിന്നും പോയതിന് ശേഷം ഞാൻ ഫ്രീ ആണെങ്കിൽ എന്നെ കാണാൻ വരണം എന്ന് പറയുന്നുണ്ട്, പിണറായി വിജയൻ ആണ് ആള് എന്ന് പറഞ്ഞു.

ഞാൻ പറഞ്ഞു ഞാൻ അങ്ങോട്ട് ചെല്ലാം കാണാൻ എന്ന്. ഞാൻ അങ്ങോട്ട് പോയി. അവിടെ വച്ചിട്ടാണ് ആ ആത്മബന്ധം ഉണ്ടാകുന്നത്. എൻ്റെ അച്ഛൻ മരിച്ച സമയത്തായിരുന്നു അത്. ആ സമയത്ത് ആച്ഛനെക്കുറിച്ചുള്ള സംസാരം കേട്ടപ്പോൾ ഞാൻ ഇമോഷണൽ ആയി. അങ്ങനെ കുറേക്കാലം ആ ബന്ധം തുടർന്നു. പക്ഷെ കാര്യത്തോട് അടുക്കുമ്പോൾ അല്ലെ എല്ലാം മനസിലാകുന്നത്. രാഷ്ട്രീയക്കാർ എല്ലാം ഒരു പോലെയാണ്, വോട്ട് കിട്ടി അധികാരം കിട്ടുന്നത് വരെ ഒരു വാക്ക്. വോട്ട് കിട്ടി അധികാരത്തിൽ എത്തിയാൽ മറ്റൊരു വാക്ക്. പുള്ളിക്ക് അധികാരം കിട്ടി ആള് മാറിയോ എന്ന് ചോദിച്ചാൽ എനിക്ക് പുള്ളിയുടെ സ്വഭാവം നേരത്തെ അറിയില്ലല്ലോ. നേരത്തെ ഇങ്ങനെ തന്നെ ആണോ എന്നും അറിയില്ലല്ലോ. എല്ലാ പാർട്ടികളും അധികാരം കിട്ടും വരെ സംസാരിക്കുന്നത് വളരെ നല്ലവർ ആയിട്ടാണ്. എന്നാൽ അധികാരം കിട്ടി കഴിയുന്നതോടെ ആളുകൾ മാറും, ശ്രീനിവാസൻ പറഞ്ഞു.