Keralafox

വിവാഹ മോചനം ആഘോഷമാക്കി ഫോട്ടോഷൂട്ട് നടത്തി തമിഴ് സീരിയൽ നടി ശാലിനി രംഗത്ത്. ഭര്‍ത്താവിനൊപ്പമുള്ള ഫോട്ടോ വലിച്ച് കീറിയും ചവിട്ടി അരച്ചും നടത്തിയ ഫോട്ടോഷൂട്ട് ആണ് ഇപ്പോൾ സാമൂഹിക മാധ്യമങ്ങളിൽ വൈറലാകുന്നത്. ജീവിതത്തിലെ എല്ലാ കാര്യങ്ങളും ആഘോഷിക്കുകയും ഫോട്ടോഷൂട്ട് നടത്തുകയും ചെയ്യുന്ന ഈ കാലത്ത് ഇതാദ്യമായാണ് ഒരു ഡിവേഴ്സ് ഫോട്ടോഷൂട്ട് ശ്രദ്ധേയമാവുകയാണ്. ഇങ്ങനെയൊരു ഫോട്ടോഷൂട്ട് ഇന്ത്യയിൽ ആദ്യമാണെന്നാണ് ചിത്രങ്ങൾ പകർത്തിയ ഐറിസ് ഫൊട്ടോഗ്രഫി ടീം അവകാശപ്പെടുന്നത്.

തമിഴ് സീരിയൽ താരമാണ് ശാലിനി. മുള്ളും മലരും എന്ന ടിവി സീരിയലിലൂടെ പ്രശസ്തയാണ്. സൂപ്പര്‍ മോം എന്ന ടെലിവിഷന്‍ റിയാലിറ്റി ഷോയിലും ശാലിനി പങ്കെടുത്തിട്ടുണ്ട്. റിയാസ് ആയിരുന്നു താരത്തിൻ്റെ ഭർത്താവ്. ഇവർക്ക് റിയ എന്ന മകളുണ്ട്. കുറച്ച്‌ മാസങ്ങൾക്ക് മുമ്പാണ്, ശാലിനി തന്നെ മാനസികമായും ശാരീരികമായും പീഡിപ്പിക്കുന്നുവെന്ന് ആരോപിച്ച്‌ ഭർത്താവ് വിവാഹമോചനത്തിന് ശ്രമിച്ചു തുടങ്ങിയതെന്നാണ് റിപ്പോർട്ട്.

ചുവന്ന നിറത്തിലുള്ള ലെഗ്തി ഗൗണ്‍ ധരിച്ച് നില്‍ക്കുന്ന ഫോട്ടോസ് ഇതിനോടകം സോഷ്യല്‍ മീഡിയയില്‍ വൈറലായിക്കഴിഞ്ഞു. സന്തോഷത്തോടെ പൊട്ടിച്ചിരിയ്ക്കുന്ന ചിത്രങ്ങളും കോപത്തോടെ നോക്കുന്നതും, അറപ്പോടെ ഭര്‍ത്താവിനൊപ്പമുള്ള ഫോട്ടോ കീറുന്നതും, വെറുപ്പോടെ ഫോട്ടോസ് ചവിട്ട് അരക്കുന്നതും എല്ലാം ചിത്രങ്ങളില്‍ കാണാം. ശബ്ദമില്ലാത്തവർക്ക് ആഘോഷിക്കാനുള്ള വിവാഹമോചന സന്ദേശമാണ് ഇതെന്ന് ചിത്രത്തിനൊപ്പം ശാലിനി സോഷ്യൽ മീഡിയയിൽ കുറിച്ചു.

‘ഒരു മോശം ദാമ്പത്യം ഉപേക്ഷിക്കുന്നതിൽ കുഴപ്പമില്ല. കാരണം നിങ്ങൾ സന്തോഷവാനായിരിക്കാൻ അർഹനാണ്. ഒരിക്കലും സ്വയം വിലകുറച്ച് കാണരുത്. നിങ്ങളുടെ ജീവിതത്തിന്റെ നിയന്ത്രണം ഏറ്റെടുക്കുകയും, നിങ്ങൾക്കും നിങ്ങളുടെ കുട്ടിയുടെ ഭാവിക്കും ആവശ്യമായ മാറ്റങ്ങൾ വരുത്താൻ തയ്യാറാകുകയും ചെയ്യുക. വിവാഹമോചനം ഒരു പരാജയമല്ല. നിങ്ങളുടെ ജീവിതത്തിൽ നല്ല മാറ്റങ്ങൾ വരുത്തുന്ന ഒരു വഴിത്തിരിവ് ആണത്. ഒരു ദാമ്പത്യബന്ധം ഉപേക്ഷിക്കാൻ വലിയ ധൈര്യം ആവശ്യമാണ്. സ്റ്റാൻഡ് ഔട്ട്. എന്റെ എല്ലാ ധൈര്യശാലികൾക്കും ഞാൻ ഇത് സമർപ്പിക്കുന്നു’, ശാലിനി വ്യക്തമാക്കി.