Keralafox

എ ഐ ക്യാമറകൾ നിരത്തുകളിൽ സജീവമായതോടെ ട്രാഫിക് നിയമലംഘനങ്ങൾ കുറയുന്നതായി മോട്ടോർ വാഹന വകുപ്പ് അറിയിച്ചു. പെട്രോളിങ്ങിന് ഇറങ്ങുന്ന മോട്ടോർ വാഹന വകുപ്പ് സ്പെഷ്യൽ സ്ക്വാഡുകൾക്ക് കേസ് ഇല്ലാത്ത അവസ്ഥയാണ് നിലവിൽ. നാടിൻറെ നാനാഭാഗത്തും വച്ചിരിക്കുന്ന ക്യാമറകളെ പേടിച്ച് നിയമങ്ങൾ പൂർണമായും പാലിച്ചാണ് ബഹുഭൂരിപക്ഷം പേരും റോഡുകളിലേക്ക് വാഹനങ്ങൾ ഇറക്കുന്നത് എന്ന് ഉദ്യോഗസ്ഥർ പറയുന്നു. അതേസമയം തന്നെ പോലീസിന്റെയും ക്യാമറയുടെയും കണ്ണുവെട്ടിച്ച് ഇരുചക്രവാഹനങ്ങളിൽ മക്കളെ കൊണ്ട് യാത്ര ചെയ്യാനുള്ള പെടാപ്പാടാണ് രക്ഷിതാക്കൾ നടത്തുന്നത്. സാധാരണക്കാരനെ സംബന്ധിച്ചിടത്തോളം ക്യാമറയുടെ വരവ് വലിയതോതിലുള്ള പ്രതിസന്ധിയാണ് സൃഷ്ടിച്ചിരിക്കുന്നത്

രണ്ടു മക്കളുമായി ഇരുചക്ര വാഹനത്തിൽ യാത്ര ചെയ്യുന്ന മാതാപിതാക്കൾക്ക് ഇത് വലിയ തിരിച്ചടിയാണ് സൃഷ്ടിച്ചിരിക്കുന്നത്. നിലവിലെ വേനൽ കാല ക്യാമ്പുകൾക്കും നീന്തൽ തുടങ്ങിയ പരിശീലനങ്ങൾക്കും കുട്ടികളുമായി യാത്ര ചെയ്യാൻ കഴിയാത്ത അവസ്ഥയാണ് രക്ഷകർത്താക്കൾക്ക്. ഒരു വീട്ടിൽ നിന്ന് രണ്ടു കുട്ടികളുമായി യാത്ര ചെയ്യുന്ന അച്ഛനമ്മമാർ അവധി ആഘോഷം കഴിയുന്നതോടെ എന്ത് ചെയ്യും എന്ന് ചോദ്യവും ഉയരുന്നുണ്ട്. ഇതേസമയം തന്നെ കഴിഞ്ഞദിവസം ഗണേഷ് കുമാർ പറഞ്ഞ വാക്കുകളും മാധ്യമങ്ങളിൽ വലിയതോതിൽ ചർച്ച ചെയ്യപ്പെട്ടിരുന്നു. നിയമങ്ങൾ സാധാരണക്കാരനെ സംരക്ഷിക്കുവാൻ വേണ്ടിയുള്ളതാണെന്നും അത് ദ്രോഹിക്കാനുള്ളത് ആകരുതെന്ന് എംഎൽഎ ഗണേഷ് കുമാർ പറഞ്ഞിരുന്നു

കുഞ്ഞിനെ ഇരുത്തി സ്കൂട്ടറിൽ പോകുന്നവരെ ശിക്ഷിക്കുന്നത് ശരിയല്ലെന്ന് അദ്ദേഹം പറയുകയുണ്ടായി. യാതൊരു വഴിയും ഇല്ലാതെ വരുമ്പോൾ ആളുകൾ നിയമം ലംഘിക്കുവാൻ തുടങ്ങും എന്നതിൻറെ സൂചനയാണ് ഇപ്പോൾ തിരുവനന്തപുരം നഗരത്തിൽ നിന്നും സോഷ്യൽ മീഡിയയിൽ വ്യാപകമായി പ്രചരിച്ചുകൊണ്ടിരിക്കുന്ന വീഡിയോ. തിരുവനന്തപുരം പാളയത്ത് നിന്ന് ഇന്ന് രാവിലെ ഒരു യാത്രക്കാരന്റെ ശ്രദ്ധയിൽപ്പെട്ട വീഡിയോയാണ് മാധ്യമങ്ങളിൽ വലിയ തോതിൽ പ്രചരിക്കുന്നത്.മൂത്ത കുഞ്ഞിനെ സ്കൂട്ടറിൽ പുറകിൽ ഇരുത്തി ഇളയ കുഞ്ഞിനെ സ്കൂട്ടറിന്റെ സീറ്റിനിടയിൽ കാലിന് ഉള്ളിലായി കുത്തിനിറച്ചുകൊണ്ട് സ്കേറ്റിംഗ് പരിശീലനത്തിന് കൊണ്ടുപോകുന്ന ഒരു അമ്മയുടെ വീഡിയോ ആണിത്. ക്യാമറയുടെയും മോട്ടോർ വാഹന വകുപ്പിന്റെയും കണ്ണുവെട്ടിച്ച് കുഞ്ഞിനെ ശരിക്ക് പറഞ്ഞാൽ ചുരുട്ടിക്കൂട്ടി വാഹനത്തിന് ഇടയിൽ വെച്ചുകൊണ്ടാണ് ഈ അമ്മ യാത്ര ചെയ്യുന്നത്. ഇത്തരത്തിലുള്ള യാത്രകൾ നിയമലംഘനം എന്നതിനപ്പുറം സാധാരണക്കാരന്റെ രോദനം കൂടിയാണെന്ന് മാധ്യമങ്ങൾ പറയുന്നു.