നാൻ വന്തിട്ടേന്ന് സൊല്ല്: ഇൻസ്റ്റഗ്രാമിൽ അരങ്ങേറ്റം കുറിച്ച് നയൻതാര, ആദ്യ പോസ്റ്റ് മക്കൾക്കൊപ്പം, വൈറൽ

ആദ്യം തന്റെ ഇരട്ടകുഞ്ഞുങ്ങളുടെ ചിത്രം പങ്കുവച്ച നയൻതാര പിന്നീട് ജവാന്റെ ട്രെയിലർ പുറത്തുവിട്ടു. വെറും ഒരു മണിക്കൂറിനുള്ളിൽ നാല് ലക്ഷത്തിലേറെയാണ് നയൻസിനെ പിന്തുടരുന്നത്. ആദ്യമായാണ് നയൻതാര കുഞ്ഞുങ്ങളുടെ മുഖം പ്രേക്ഷകർക്കു പരിചയപ്പെടുത്തുന്നതും.

മലയാള താരങ്ങൾ ഉൾപ്പെടെ നയൻതാരയുടെ ഫോളവേഴ്സ് ലിസ്റ്റിലുണ്ട്. നയൻസ് ഫോളോ ചെയ്യുന്നതാകട്ടെ അഞ്ചു പേരെയും. ഭർത്താവ് വിഗ്നേഷ് ശിവൻ, നടൻ ഷാരൂഖ് ഖാൻ, റൗഡി പിക്ചേഴ്സ്, അനിരുദ്ധ് രവിചന്ദർ, മിഷേൽ ഒബാമ എന്നിവരെയാണ് നയൻതാര ഫോളോ ചെയ്യുന്നത്.

‘മൈ ഉയിർസ് വെൽകം ടു ഐജി’ എന്നാണ് വിഗ്നേഷ് ശിവന്റെ കമന്റ്. ആദ്യ പോസ്റ്റ് ഒരു റീൽ രൂപത്തിലാണ് നയൻസ് പോസ്റ്റ് ചെയ്തത്. നയൻതാരയുടെ വീട്ടിനുള്ളിൽ വച്ചെടുത്ത വിഡിയോയാണിത്. ‘നാൻ വന്തിട്ടെൻ എന്ന് സൊല്ല്’ എന്നാണ് വിഡിയോയ്ക്ക് നയൻസിന്റെ അടിക്കുറിപ്പ്.