ബോയ് ആയാലും ഗേള്‍ ആയാലും കരഞ്ഞ് പോകും; കുഞ്ഞിൻ്റെ ജെന്‍ഡര്‍ റിവീല്‍ പാര്‍ട്ടിയുടെ വിശേഷങ്ങള്‍ പങ്കുവെച്ച് ലിൻ്റു റോണി
ടെലിവിഷൻ സിനിമാരംഗത്ത് പല വേഷങ്ങളിലായെത്തി എല്ലാവർക്കും പരിചിതയായ മുഖമാണ് ലിൻ്റു റോണിയുടേത്. നിലവിൽ അഭിനയത്തില്‍ അത്രത്തോളം സജീവമല്ലെങ്കിലും സ്വന്തം യൂട്യൂബ് ചാനലിലൂടെ ലിൻ്റു വിശേഷങ്ങളെല്ലാം തൻ്റെ പ്രേക്ഷകരുമായി പങ്കുവെക്കാറുണ്ട്. കാത്തിരിപ്പിനൊടുവിൽ തന്നെതേടിയെത്തിയ കുഞ്ഞതിഥിയുടെ വരവിനായുള്ള കാത്തിരിപ്പിലാണ് ലിൻ്റുവും ഭർത്താവും ഇപ്പോൾ. അതിൻ്റെയെല്ലാം വിശേഷങ്ങളും യൂട്യൂബിലൂടെയായി താരം അറിയിക്കുന്നുമുണ്ട്.
8 വര്‍ഷത്തെ നീണ്ട കാത്തിരിപ്പിന് വിരാമം കുറിച്ചുകൊണ്ട് കുഞ്ഞതിഥി എത്തുന്ന സന്തോഷത്തിലാണ് ലിൻ്റുവും റോണിയും. വിവാഹം കഴിഞ്ഞ് നാളിത്രയായിട്ടും കുഞ്ഞായില്ലേ എന്ന തരത്തിലുള്ള ചോദ്യങ്ങളൊക്കെ ഒത്തിരി പ്രാവശ്യം കേട്ടിട്ടുണ്ട്. സൗന്ദര്യം പോവുമെന്ന് കരുതിയാണ് ഞാന്‍ പ്രസവിക്കാതിരിക്കുന്നത് എന്ന കമൻ്റുകള്‍ വരെ കേട്ടിട്ടുണ്ടെന്നും ലിൻ്റു പറഞ്ഞിരുന്നു. ആദ്യ സ്‌കാനിംഗിന് ശേഷമായാണ് ലിൻ്റു താൻ ഗർഭിണിയാണെന്ന സന്തോഷവാര്‍ത്ത പുറത്തറിയിച്ചത്. ഇപ്പോഴിതാ കുഞ്ഞിൻ്റെ ജെന്‍ഡര്‍ റിവീല്‍ പാര്‍ട്ടിയുടെ വിശേഷങ്ങള്‍ തൻ്റെ യൂട്യൂബ് പ്രേക്ഷകരുമായി പങ്കിട്ടിരിക്കുകയാണ് ലിൻ്റു.
സുഹൃത്തുക്കളും ബന്ധുക്കളുമടക്കം നിരവധി പേരാണ് പാര്‍ട്ടിക്കെത്തിയത്. ആണായാലും പെണ്ണായാലും ആരോഗ്യത്തോടെ ആളിങ്ങെത്തിയാല്‍ മതിയെന്നായിരുന്നു റോണി പറഞ്ഞത്. വരാനിരിക്കുന്നത് ആണാണോ പെണ്ണാണോ എന്നെനിക്കറിയില്ല. അതറിയുന്നവളാകട്ടെ എന്നോടൊന്നും പറയുന്നുമില്ല. ചത്താലും പറയില്ലെന്നായിരുന്നു ലിൻ്റുവിൻ്റെ കൂട്ടുകാരി പറഞ്ഞത്. മോനെ കിട്ടുന്നതാണ് കൂടുതല്‍ നല്ലതെന്നായിരുന്നു ഒരാളുടെ കമൻ്റ്. ആണ്‍കുട്ടിയാണോ പെണ്‍കുട്ടിയാണോ എന്നായിരുന്നു ചോദ്യങ്ങള്‍. അവരവരുടെ ആഗ്രങ്ങള്‍ ഓരോരുത്തരും പറയുന്നുണ്ടായിരുന്നു. ഗേള്‍ എന്നായിരുന്നു ലിൻ്റുവിൻ്റെ മമ്മി പറഞ്ഞത്. ഡാഡി പറയുന്നത് ആണ്‍കുട്ടിയായിരിക്കുമെന്നാണെന്നും മമ്മി പറഞ്ഞിരുന്നു. കൊച്ചിയില്‍ നിന്നും എനിക്ക് വേണ്ടി കൊടുത്തുവിട്ട ഉടുപ്പാണിതെന്നായിരുന്നു കോസ്റ്റിയൂമിനെക്കുറിച്ച് ലിൻ്റു പറഞ്ഞത്. ജെന്‍ഡര്‍ പരസ്യമാക്കിയതിന് ശേഷം ലിൻ്റു കരഞ്ഞിരുന്നു. എന്തിനാണ് കരയുന്നത്, ഒരു മോനെ നമ്മള്‍ ആഗ്രഹിച്ചതല്ലേ എന്നായിരുന്നു ഡാഡി ചോദിച്ചത്. ബോയ് ആയാലും ഗേള്‍ ആയാലും കരഞ്ഞ് പോവുമെന്നായിരുന്നു ലിൻ്റു പറഞ്ഞത്.
ഞാനിപ്പോഴാണ് ഉള്ളിലുള്ള ആള്‍ ആണ്‍കുട്ടിയാണെന്ന് അറിഞ്ഞത്. അതില്‍ സന്തോഷമുണ്ട്. ആഗ്രഹിച്ചത് പോലെ തന്നെ ഈ ചടങ്ങ് മനോഹരമാക്കാന്‍ കഴിഞ്ഞു. ഈ ലൊക്കേഷനൊക്കെ കണ്ടുപിടിച്ച് കാര്യങ്ങളെല്ലാം സെറ്റാക്കിയത് റോണിയായിരുന്നു. എപ്പോഴും എന്നെ സര്‍പ്രൈസ് തന്ന് ഞെട്ടിക്കാറുണ്ട് അദ്ദേഹം. അത് നിങ്ങള്‍ക്കും അറിയാവുന്ന കാര്യമാണ്. അടുത്ത പ്രാവശ്യം അദ്ദേഹത്തിന് നല്ലൊരു സര്‍പ്രൈസ് കൊടുക്കാന്‍ പറ്റണേ എന്ന് ഞാന്‍ പ്രാര്‍ത്ഥിക്കാറുണ്ട്. 30ാമത്തെ ആഴ്ചയാണ് ഇപ്പോള്‍. 70 ശതമാനം ആളുകളും എന്നോട് ആണ്‍കുഞ്ഞായിരിക്കും ജനിക്കുന്നതെന്ന് പറഞ്ഞിരുന്നു. മോനൂട്ടനാണ് വരാന്‍ പോവുന്നതെന്നായിരുന്നു അവരെല്ലാം പറഞ്ഞത്. എന്റെ കുഞ്ഞ് സ്വര്‍ഗത്തിലുണ്ടെന്ന് എനിക്കറിയാം. ഞാന്‍ ആഗ്രഹിച്ചത് പെണ്‍കുഞ്ഞിനെയാണെങ്കിലും ദൈവം എനിക്ക് ആണ്‍കുഞ്ഞിനെ തന്നു. അകാലത്തില്‍ നഷ്ടമായ സഹോദരന്‍ മോനൂട്ടനെക്കുറിച്ച് വാചാലയായി നേരത്തെയും ലിൻ്റു എത്തിയിരുന്നു.
