വാമികയ്ക്ക് കുഞ്ഞനുജൻ, വിരാട് കോഹ്ലിക്കും അനുഷ്ക ശർമ്മയ്ക്കും ആൺകുഞ്ഞ് പിറന്നു
ക്രിക്കറ്റ് താരം വിരാട് കോഹ്‌ലിയ്ക്കും ബോളിവുഡ് താരം അനുഷ്ക ശർമ്മയ്ക്കുംരണ്ടാമത്തെ കുഞ്ഞ് ജനിച്ചു. ഫെബ്രുവരി 15ന് ആൺകുഞ്ഞ് ജനിച്ചതായി വിരാടും അനുഷ്‌കയും ഇൻസ്റ്റഗ്രാം പേജിലൂടെ അറിയിച്ചു. അകായ് എന്നാണ് കുഞ്ഞിന് പേരിട്ടിരിക്കുന്നത്. ഫിസിക്കൽ ബോഡി (ഭൗതിക ശരീരം) എന്നർത്ഥം വരുന്ന ‘കായ’ എന്ന ഹിന്ദി വാക്കിൽ നിന്നാണ് അകായ് എന്ന പേരുണ്ടായത്.
വിരാടിന്റേയും അനുഷ്‌കയുടേയും പോസ്റ്റ് ഇങ്ങനെ:
‘വളരെ സന്തോഷത്തോടെയും ഹൃദയം നിറഞ്ഞ സ്‌നേഹത്തോടെയും, ഫെബ്രുവരി 15 ന്, വാമികയുടെ കുഞ്ഞ് സഹോദരൻ, ഞങ്ങളുടെ കുഞ്ഞ് അകായെ ഈ ലോകത്തേക്ക് സ്വാഗതം ചെയ്തതായി എല്ലാവരേയും അറിയിക്കുന്നതിൽ സന്തോഷമുണ്ട്! ഞങ്ങളുടെ ജീവിതത്തിലെ ഈ മനോഹരമായ സമയത്ത്, നിങ്ങളുടെ അനുഗ്രഹങ്ങളും ആശംസകളും ഞങ്ങൾക്കുണ്ടാകണം. ഈ സമയത്ത് ഞങ്ങളുടെ സ്വകാര്യതയെ ബഹുമാനിക്കാൻ നിങ്ങളോട് അഭ്യർത്ഥിക്കുന്നു. സ്‌നേഹവും നന്ദിയും, വിരാട് & അനുഷ്ക
രൺവീർ സിംഗ്, വാണി കപൂർ തുടങ്ങി നിരവധി താരങ്ങളും ആരാധകരും പോസ്റ്റിൽ താരങ്ങൾക്ക് അഭിനന്ദനം അറിയിച്ചു. അനുഷ്ക ശർമ്മ ഗർഭിണിയാണെന്ന വിവരം ആരാധകരിൽ നിന്ന് മറച്ചുവച്ച് സർപ്രൈസായാണ് താരങ്ങൾ കുഞ്ഞ് ജനിച്ചകാര്യം ആരാധകരെ അറിയിച്ചത്.
വർഷങ്ങളായുള്ള പ്രണയത്തിനു ശേഷം 2017ലാണ് വിരാടും അനുഷ്‌കയും വിവാഹിതരായത്. 2021 ജനുവരിയിലാണ് മകൾ വാമികയെ ദമ്പതികൾ സ്വാഗതം ചെയ്തത്.
