Keralafox

മലയാളികളുടെ പ്രീയപ്പെട്ട താരങ്ങളായ സ്‌നേഹക്കും ശ്രീകുമാറിനും കുഞ്ഞതിഥി ജനിച്ചത് അടുത്തിടെയാണ്. സോഷ്യൽ മീഡിയയിൽ സജീവമായ സ്‌നേഹയും ശ്രീകുമാറും തങ്ങളുടെ വിശേഷങ്ങളെല്ലാം ആരാധകരുമായി പങ്കുവെച്ച് എത്താറുണ്ട്.

പ്രസവത്തിന് മുൻപും ശേഷവും ശ്രദ്ധിക്കേണ്ട കാര്യങ്ങളെക്കുറിച്ച് പറഞ്ഞും സ്നേഹ എത്തിയിരുന്നു. തന്റെ അനുഭവമാണ് വീഡിയോയിലൂടെ പറയുന്നതെന്ന് താരം വ്യക്തമാക്കിയിരുന്നു. പലപ്പോഴായി ഞാൻ കടന്നുപോയതും, എനിക്കുണ്ടായ ഫീലിംഗ്‌സുമൊക്കെയാണ് ഈ വീഡിയോയിലൂടെ പറയുന്നത്. സുഹൃത്തുക്കളോട് ചോദിച്ചപ്പോൾ അവരും സമാനമായ അനുഭവങ്ങളിലൂടെ കടന്നുപോയിട്ടുണ്ടെന്ന് പറഞ്ഞിരുന്നു. ഗർഭിണിയായിരുന്ന സമയത്തെയും, പ്രസവം കഴിഞ്ഞതിന് ശേഷമുള്ളതുമായ കുറച്ച് കാര്യങ്ങളെക്കുറിച്ചാണ് പറയുന്നത്. പ്രഗ്നന്റായിരുന്ന സമയത്ത് ഞാൻ ഇഷ്ടമുള്ള കാര്യങ്ങളെല്ലാം ചെയ്തിട്ടുണ്ട്. സോഷ്യൽ മീഡിയയിൽ സജീവമായിരുന്നു. ഡ്രൈവ് ചെയ്തിട്ടുണ്ട്, അഭിനയിക്കുന്നുണ്ടായിരുന്നു. ഇതൊക്കെ കാണുമ്പോൾ ഞാൻ നൂറ് ശതമാനം സന്തോഷമാണെന്നായിരിക്കും എല്ലാവരും കരുതുന്നത്. എന്നാൽ അങ്ങനെയല്ല, സങ്കടപ്പെട്ട സമയമൊക്കെയുണ്ടായിട്ടുണ്ട്.

ആദ്യമൊക്കെ സന്തോഷമായിരുന്നുവെങ്കിലും ചില സിറ്റുവേഷൻ എങ്ങനെയാണ് കൈകാര്യം ചെയ്യേണ്ടതെന്ന് എനിക്കും ശ്രീക്കും അറിയില്ലായിരുന്നു. തുടക്കകാലത്ത് ഞാൻ കരയുകയും ദേഷ്യപ്പെടുകയും വഴക്കിടുകയുമൊക്കെ ചെയ്തിട്ടുണ്ട്. ഭയങ്കരമായിട്ട് മൂഡ് ചെയ്ഞ്ചുണ്ടായിരുന്നു. ചെറിയ കാര്യങ്ങളിൽ വരെ വല്ലാതെ സങ്കടം വരും. ഒരു ഗുളിക വാങ്ങിക്കാൻ അഞ്ച് മിനിട്ട് വൈകിയാൽ വഴക്കിടുമായിരുന്നു. ഇവൾക്കെന്താ വട്ടാണോ, എന്തിനാ വഴക്കിടുന്നതെന്നൊക്കെ ശ്രീ വിചാരിച്ചിരുന്നു. പ്രഗ്നൻസിയിലെ മൂഡ് ചെയ്ഞ്ചാണ് ഇതിന് കാരണമെന്ന് മനസിലാക്കിയതോടെ ശ്രീ നന്നായി കെയർ ചെയ്തിരുന്നു.

ശരിക്കും സങ്കടം വന്ന രണ്ടുമൂന്ന് സന്ദർഭങ്ങൾ ഉണ്ടായിട്ടുണ്ട്. ഗർഭിണികൾക്ക് പെട്ടെന്ന് സങ്കടവും കരച്ചിലുമൊക്കെ വരും. കരഞ്ഞാൽ വയറുവേദനയും തലവേദനയും വരും. അതിന് മരുന്ന് കഴിക്കാനും പറ്റില്ല. പ്രഗ്നന്റായവരെ കെയർ ചെയ്യുന്നത് അവരെ ബോധ്യപ്പെടുത്തണം. ആ സമയത്ത് പലതരം ഇഷ്ടങ്ങളായിരിക്കും. ഇന്ന് മധുരം ഇഷ്ടമാണെങ്കിൽ നാളെ അത് കഴിക്കാൻ തോന്നില്ല. ചില സാധനങ്ങൾ ആഗ്രഹം തോന്നിയാലും മുന്നിൽ കിട്ടിയാൽ കഴിക്കാൻ തോന്നില്ല. ഗർഭിണിയായിരിക്കുമ്പോൾ നമ്മളോട് ഒരാൾ എങ്ങനെ പെരുമാറിയെന്ന കാര്യം മനസിൽ നിന്നും പോവില്ലെന്ന് ഞാൻ വായിച്ചിട്ടുണ്ട്. അത് നൂറ് ശതമാനം ശരിയാണ്.

നമ്മളെ കെയർ ചെയ്തവരോട് നമുക്കൊരുപാട് സ്‌നേഹം തോന്നും. നമ്മളെ ആരെങ്കിലും വിഷമിപ്പിച്ചിട്ടുണ്ടെങ്കിൽ അവരെ വിട്ടേക്കുക. എന്തെങ്കിലും സാധനം മേടിക്കുമ്പോൾ എക്‌സ്ട്രാ ഒരെണ്ണം വാങ്ങിക്കുക. കഴിഞ്ഞ ദിവസം കഴിച്ചില്ലെങ്കിലും ചിലപ്പോൾ നിങ്ങൾ കഴിക്കുന്നത് കണ്ടാൽ അവർക്ക് കഴിക്കാൻ തോന്നും. എന്റെ മുന്നിൽ നിന്ന്, എനിക്ക് ഭക്ഷണം തരാതെ മാറിയിരുന്ന് കഴിച്ച ചില ആൾക്കാരുണ്ട്. അതെനിക്ക് ഫീലാവേണ്ട കാര്യമില്ല. എന്റെ കൈയ്യിൽ പൈസയുണ്ട്, ഞാനെന്ത് വേണമെന്ന് പറഞ്ഞാലും ശ്രീയോ അമ്മയോ വാങ്ങിത്തരും. ആ സമയത്ത് അതൊക്കെ ഫീലാവും. ഒന്നുകിൽ ഗർഭിണികളുടെ മുന്നിൽ വെച്ച് കഴിക്കാതിരിക്കുക, അല്ലെങ്കിൽ അവരെ കാണിക്കാതിരിക്കുക.

ഡെലിവറി കഴിഞ്ഞ സമയത്ത് അയ്യോ ഭയങ്കരമായിട്ട് തടിച്ചല്ലോ എന്ന് പറഞ്ഞവരുണ്ട്. ഞാൻ നേരത്തെയും തടിച്ചിട്ടായിരുന്നല്ലോ എന്ന് ചോദിക്കുമ്പോൾ ഇത് ഒരുപാട് കൂടിയെന്ന് പറഞ്ഞിട്ടുണ്ട്. വയർ കുറയാനെന്താണ് ഒന്നും ചെയ്യാത്തതെന്നുള്ള ചോദ്യങ്ങളും കേട്ടിട്ടുണ്ട്. സി സെക്ഷൻ ഡെലിവറി കഴിഞ്ഞ് മൂന്ന് മാസമായതേയുള്ളൂ, ഇപ്പോൾ ഒന്നും ചെയ്യാനാവില്ലെന്ന് പറയുമ്പോൾ ഭക്ഷണം കുറയ്ക്കണമെന്ന് പറയും. എന്താണ് തടി കുറയാത്തത്, എന്താണ് ഭക്ഷണം കുറയ്ക്കാത്തതെന്ന ചോദ്യം ഡെലിവറി കഴിഞ്ഞവരോട് ചോദിക്കുന്നതെന്തിനാണെന്ന് എനിക്ക് മനസിലാവുന്നില്ല.

മറിമായത്തിലെ മികച്ച കെമിസ്ട്രി ജീവിതത്തിലും പകർത്തുകയാണ് ഇരുവരും. കളിചിരിയും തമാശകളുമൊക്കെയായി മുന്നേറുകയാണ്. സമകാലിക വിഷയങ്ങൾ നർമ്മത്തിൽ ചാലിച്ച്‌ പ്രേക്ഷകരിൽ എത്തിക്കുന്ന ടെലിവിഷൻ പരിപാടിയായ മറിമായത്തിലെ ലോലിതൻ, മണ്ഡോദരി എന്നീ കഥാപാത്രങ്ങളായി പ്രേക്ഷകരുടെ പ്രിയം നേടിയ അഭിനേതാക്കളാണ് ഇരുവരുംമറിമായത്തിലെ അഭിനയത്തിന് സംസ്ഥാന സർക്കാരിന്റെ അംഗീകാരമടക്കം നേടിയിട്ടുള്ള ശ്രീകുമാർ നിരവധി സിനിമകളിലും അഭിനയിച്ചിട്ടുണ്ട്.