Keralafox

ഭക്ഷണം എന്നത് എല്ലാവർക്കും ജീവിതത്തിൽ ഒഴിച്ചുകൂടാൻ കഴിയാത്ത ഒന്നാണ്. എന്നാൽ നിരവധി പേരാണ് ഒരു നേരത്തെ ആഹാരത്തിനായി കഷ്ടപ്പെടുന്നത്. പണം ഇല്ലാത്തതിന്റെ പേരിൽ ദാരിദ്ര്യം അനുഭവിക്കുന്ന നിരവധി പേർ ഒരു കോണിൽ കഴിയുമ്പോൾ തന്നെ പണത്തിന്റെ പേരിൽ അഹങ്കരിക്കുകയും ഭക്ഷണം ആവശ്യമില്ലാതെ പാഴാക്കുകയും ചെയ്യുന്ന ഒരു വിഭാഗം ആളുകളും നമുക്ക് ചുറ്റുമുണ്ട്. എന്നാൽ ഇല്ലാത്തവന് കൊടുക്കുമ്പോഴാണ് വയറു നിറയുന്നത് എന്ന സത്യം മനസ്സിലാക്കി ഇപ്പോൾ നിരവധി പേർ ഭക്ഷണം മറ്റുള്ളവർക്ക് നൽകി മുൻപോട്ടു വരുന്നുണ്ട്. കച്ചേരി താഴത്തെ ആൽമര ചുവട്ടിലും വിശപ്പിന്റെ വിളി കേൾക്കുന്ന ഒരു ഫുഡ് ഷെൽഫ് പ്രവർത്തിക്കുന്നുണ്ട്. ആഹാരം ഇല്ലാത്തവർക്ക് ഇവിടെ നിന്ന് ആഹാരം ലഭിക്കും.

ഒരു നേരത്തെ അന്നത്തിനു വകയില്ലാതെ വിശന്നു വലയുന്നവന് സ്നേഹം നിറച്ച പൊതിച്ചോറാണ് പ്രധാനം ചെയ്യുന്നത്. ഇവിടെ നിന്ന് ആഹാരം എടുക്കുന്നവരോട് ഫുഡ് ഷെൽഫിന് ഒന്ന് മാത്രമേ പറയാനുള്ളൂ. ഒരാൾ ഒരു പൊതി മാത്രമേ എടുക്കാവൂ. എങ്കിൽ പോലും വീട്ടിൽ ഒരാൾ കൂടി വിശന്നിരിപ്പുണ്ടെങ്കിൽ രണ്ടു പൊതിയെടുക്കാം. അങ്ങനെ എടുത്താലോ ആരും ചോദിക്കുകയുമില്ല തടയുകയുമില്ല. ഉറ്റവരാൽ ഉപേക്ഷിക്കപ്പെട്ട അമ്മമാരാണ് സ്നേഹം ചാലിച്ച രുചിക്കൂട്ടുകളുമായി ഈ പൊതിച്ചോറ് തയ്യാറാക്കി വരുന്നത്. പതിനൊന്നരയോടെ പൊതിച്ചോറുകൾ കച്ചേരി താഴത്തെ പ്രത്യേകം തയ്യാറാക്കിയ ഇരുമ്പ് ഷെൽഫിൽ പ്രത്യക്ഷപ്പെടും. ആർക്കുവേണമെങ്കിലും എടുക്കാം. സ്നേഹവീട് ചാരിറ്റബിൾ ആൻഡ് എഡ്യൂക്കേഷണൽ ട്രസ്റ്റിന്റെ നേതൃത്വത്തിലാണ് ഫുഡ് ഷെൽഫിൽ പൊതിച്ചോറുകൾ തയ്യാറാക്കി സൗജന്യമായി വിതരണം ചെയ്യുന്നത്.

ട്രസ്റ്റിന്റെ നേതൃത്വത്തിൽ നടത്തുന്ന നഗരസഭയുടെ അഗതിമന്ദിരമായ സ്നേഹവീട്ടിലെ അമ്മമാരാണ് അന്നം ഇല്ലാതെ കഷ്ടപ്പെടുന്നവർക്ക് വേണ്ടി പൊതിച്ചോറ് തയ്യാറാക്കുന്നത്. മുൻ കൗൺസിലറായ കെ ബിനേഷ് കുമാറാണ് ഭക്ഷണം സ്നേഹവീട്ടിൽ നിന്ന് കച്ചേരി താഴത്തെ ഷെൽഫിൽ എത്തിച്ച് കൊടുക്കുന്നത്. സമൂഹത്തിലെ മറ്റുള്ള നന്മമരങ്ങളുടെ സഹായത്തോടെയാണ് പൊതിച്ചോറുകൾ തയ്യാറാക്കുന്നതെന്ന് ബിനീഷ് കുമാർ പറയുന്നു. കുടിവെള്ളവും ഇവിടെ സൗജന്യമായി നൽകും. നഗരത്തിൽ അലഞ്ഞു തിരിയുന്നവർക്കും ഒരു നേരത്തെ ഭക്ഷണത്തിന് വകയില്ലാത്തവർക്കും ആശ്രയം ആവുകയാണ് ആൽമരച്ചോട്ടിലെ ഈ ഫുഡ് ഷെൽഫ്. ഇന്നും കരുണയും സ്നേഹവും വറ്റാത്ത ധാരാളം ആളുകൾ നമുക്ക് ചുറ്റും ഉണ്ടെന്നതിന് തെളിവ് കൂടിയാണ് ഈ പ്രവർത്തി.