ഭയങ്കര സീരിയസായി ഇന്റർവ്യൂ കൊടുത്തിട്ട് കാര്യമില്ല, അത് കാണാൻ രസമുണ്ടാവില്ല, ട്രോളുകൾ പൂർണ്ണമായും മോശമല്ല; ട്രോളുകളും അഭിമുഖങ്ങളും ഇല്ലെങ്കിൽ നമ്മളിത്രയും റീച്ചാവില്ലെന്ന് ഷൈൻ ടോം ചാക്കോ

നിരന്തരം വിവാദങ്ങളിൽ ഇടം പിടിക്കുന്ന താരമാണ് ഷൈൻ ടോം ചാക്കോ. ദീർഘകാലം കമലിനൊപ്പം സഹസംവിധായകനായി പ്രവർത്തിച്ച ഷൈൻ 2011ൽ ഗദ്ദാമയിലൂടെ അഭിനയരംഗത്തേക്ക് തിരിഞ്ഞു. 2012ൽ ഈ അടുത്ത കാലത്ത്, ചാപ്‌റ്റോഴ്‌സ് എന്നീ ചിത്രങ്ങളിൽ അഭിനിയിച്ചു. 2013ൽ അന്നയും റസൂലും എന്ന ചിത്രത്തിൽ അബു എന്ന കഥാപാത്രത്തെ അവതരിപ്പിച്ചു. 2014ൽ ഇതിഹാസ എന്ന ചിത്രത്തിൽ പ്രധാന കഥാപാത്രത്തെ അവതരിപ്പിച്ചു. 2015 ജനുവരിയിൽ നിരോധിത ലഹരിമരുന്നായ കൊക്കെയ്‌നുമായി ഷൈനിനെയും മറ്റു 4 പേരെയും കൊച്ചിയിലെ ഒരു ഫ്‌ലാറ്റിൽ വച്ച് പോലീസ് അറസ്റ്റ് ചെയ്തു.തുടർന്ന് അറുപത് ദിവസത്തോളം ഷൈൻ ജയിലിൽ കഴിഞ്ഞു.

കഥാപാത്രങ്ങൾ പോലെ തന്നെ ഷൈനിന്റെ അഭിമുഖങ്ങളും സോഷ്യൽ മീഡിയയിൽ വൈറലാകാറുണ്ട്. സംസാരം കൊണ്ടും തന്റെ പെരുമാറ്റ രീതികൾ കൊണ്ടും ഷൈൻ വിവാദങ്ങളിൽ ഇടംപിടിക്കാറുണ്ട്. താരത്തിന്റെ ഇന്റർവ്യൂകളും പെരുമാറ്റ രീതികളും ഒക്കെ തന്നെ വിമർശനങ്ങൾക്ക് ഇടയുണ്ടാക്കി. ഒരേ സമയം ആരാധകരേയും വിമർശകരേയും ഒരുപോലെ സമ്പാദിച്ച താരം കൂടിയാണ് ഷൈൻ. എന്നാൽ, ഹേറ്റേഴ്സിനെ പോലും നിശബ്ദരാക്കുന്ന പ്രതിഭയാണ് താനെന്ന് അദ്ദേഹം ഇതിനോടകം തന്നെ തെളിയിക്കുകയും ചെയ്തു. ഇപ്പോഴിതാ ട്രോളുകളെ കുറിച്ച് പ്രതികരിക്കുകയാണ് ഷൈൻ ടോം ചാക്കോ.

ട്രോളുകൾ ഇങ്ങനെ വരുന്നത് കൊണ്ട് കൂടിയാണ് കൂടുതൽ ആളുകളിലേക്ക് റീച്ചാവുന്നതെന്ന് ഷൈൻ പറയുന്നു. ‘ട്രോളുകൾ പൂർണ്ണമായും മോശമല്ല. ട്രോളുകളിലൂടെ നമുക്ക് ചില ഗുണങ്ങളുമുണ്ട്. ഇങ്ങനെ ട്രോളുകളും അഭിമുഖങ്ങളും ഇല്ലെങ്കിൽ നമ്മളിത്രയും റീച്ചാവില്ല. നമ്മൾ ചെയ്യാത്ത, പറയാത്ത കാര്യങ്ങൾ പറയുമ്പോഴാണ് നമുക്ക് ചില സമയത്ത് വിഷമം വരുന്നത്. നമ്മുടെ കൂടെയുള്ളവരാണ് കൂടുതൽ വിഷമിക്കുന്നത്. അത് കാണുമ്പോൾ നമുക്ക് ദേഷ്യം വരും. ഇല്ലാത്ത കാര്യങ്ങൾ പെരുപ്പിച്ച്, നമ്മൾ ചെയ്തുവെന്ന് വരുത്തി തീർക്കുമ്പോൾ ദേഷ്യം വരും’

ഹേറ്റേഴ്സില്ലാത്ത നടൻ എന്നൊന്നും പറയാനാവില്ല. ഞാൻ ചെയ്യുന്നത് ഇഷ്ടമില്ലാത്ത ആളുകളുണ്ടാവും. ഇന്റർവ്യൂൽ ഞാൻ ചെയ്യുന്നത് ഇഷ്ടപ്പെടാത്തവരുണ്ട്. ചിലതൊക്കെ കാണുമ്പോൾ ഞാൻ എന്തൊക്കെയാണ് കാണിക്കുന്നതെന്ന് എനിക്ക് തന്നെ തോന്നിയിട്ടുണ്ട്. ആദ്യം മുതലേ അഭിമുഖങ്ങൾ കൊടുക്കുന്നയാളാണ് ഞാൻ. ഭയങ്കര സീരിയസായി ഇന്റർവ്യൂ കൊടുത്തിട്ട് കാര്യമില്ല, അത് കാണാൻ രസമുണ്ടാവില്ല. അതാണ് ഓരോന്ന് കാണിക്കുന്നത്’ ഷൈൻ പറഞ്ഞു.