ആമസോണ് മഴക്കാടുകളില് കുടുങ്ങിയ കുട്ടികളെ കണ്ടെത്തി;കണ്ടുകിട്ടുമ്പോള് കുട്ടികള് തൊലിയൊട്ടി അസ്ഥികള് തെളിഞ്ഞ് കാണുന്ന നിലയില്
ആമസോണ് മഴക്കാടുകളില് അബദ്ധത്തില് കുടുങ്ങിയ കുട്ടികളെ കണ്ടെത്തി. കാണാതായി 27 ദിവസങ്ങള് കഴിഞ്ഞാണ് ഇവരെ കണ്ടെത്തിയിരിക്കുന്നത്. എട്ട് വയസ്സുകാരനായ ഗ്ലെസന് കാര്വാലോ റിബേറോയും ആറ് വയസ്സുകാരനായ ഗ്ലാക്കോ കാര്വാലോ റിബോയുമാണ് ആമസോണ് മഴക്കാടുകളില് അകപ്പെട്ടത്. തിരികെ കുട്ടികളെ കണ്ടെടുക്കുമ്പോള് ഭക്ഷണം കഴിക്കാത്തതിനെ തുടര്ന്ന് കുട്ടികള് തൊട്ടിയൊട്ടി അസ്ഥികള് തെളിഞ്ഞ് കാണുന്ന നിലയിലായിരുന്നു. ഫെബ്രുവരി 18ന് ആണ് ഇവരെ കാണാതാകുന്നത്. പക്ഷിയുടെ പിന്നാലെ കാട്ടിലേക്ക് പോയതായിരുന്നു ഇരുവരും. മാര്ച്ച് 15 ന് കാട്ടില് മരം വെട്ടാനെത്തിയ ആളാണ് കാട്ടില് കുടുങ്ങിയ കുട്ടികളെ കണ്ടെത്തിയത്.ഉടന് തന്നെ അദ്ദേഹം വിവരം പുറം ലോകത്തെ അറിയിക്കുകയായിരുന്നു. തുടര്ന്ന് കുട്ടികളെ രണ്ട് പേരേയും ടൗണ് ഹാളിലെത്തിച്ചു. വിമാന മാര്ഗം ആമസോണിന്റെ തലസ്ഥാന നഗരമായ മനാവൂസിലെത്തിച്ച ശേഷം ഇവര്ക്ക് വിദഗ്ധ ചികിത്സ നല്കാനാണ് തീരുമാനം.
ഗ്ലെസന് കാര്വാലോ റിബേറോയും ഗ്ലാക്കോ കാര്വാലോ റിബേറോയും ആമസോണിലെ പാല്മെയ്റ എന്ന തദ്ദേശീയ ഗോത്രത്തില്പ്പെട്ട കുട്ടികളാണ്.കുട്ടികളെ കാണാതായ ശേഷം കുറച്ച് ദിവസങ്ങള് പൊലീസും അഗ്നിശമന സേനയും സംയുക്തമായി തിരച്ചില് നടത്തിയിരുന്നു. പക്ഷേ, കുട്ടികളെ കണ്ടെത്താന് അവര്ക്ക് കഴിയാതെ വരുകയായിരുന്നു. പിന്നീട്, തിരച്ചില് കൊണ്ട് കാര്യമില്ലെന്ന നിഗമനത്തില് അവസാനിപ്പിക്കുകയായിരുന്നു.പൊലീസും അഗ്നിശമന സേനയും തിരച്ചില് അവസാനിപ്പിച്ചെങ്കിലും കുട്ടികളുടെ ഗോത്രമായ പാല്മെയ്റയിലെ അംഗങ്ങള് തിരച്ചില് തുടര്ന്ന് കൊണ്ടേയിരിക്കുകയായിരുനനു. ആ തിരച്ചിലാണ് ഒടുവില് ഫലപ്രാപ്തിയിലെത്തിയത്.