എന്റെ എക്കാലത്തെയും പിന്തുണയും സന്തോഷവും അമ്മ, ലോകകപ്പിൽ വെള്ളി മെഡൽ നേടാനായതിൽ ഏറെ സന്തോഷം; എല്ലാവരുടെയും സ്നേഹത്തിനും പിന്തുണയ്ക്കും നന്ദി അറിയിച്ച് പ്രഗ്നാനന്ദ
ചെസ് ലോകകപ്പിലെ വെള്ളി മെഡൽ നേട്ടത്തിൽ സന്തോഷം പ്രകടിപ്പിച്ച് ഇന്ത്യയുടെ ആർ പ്രഗ്നാനന്ദ. ലോകകപ്പിൽ പിന്തുണച്ച എല്ലാവർക്കും താരം നന്ദി പ്രകടിപ്പിച്ചു. ലോകകപ്പിൽ വെള്ളി മെഡൽ നേടാനായതിൽ ഏറെ സന്തോഷമെന്നാണ് പ്രഗ്നാനന്ദയുടെ വാക്കുകൾ. ലോകകപ്പിലൂടെ കാൻഡിഡേറ്റ്സ് ചെസ് ടൂർണ്ണമെന്റിനും യോഗ്യത നേടി. ഏല്ലാവരുടെയും സ്നേഹത്തിനും പിന്തുണയ്ക്കും ഏറെ നന്ദി. എല്ലാവരുടെയും അഭിനന്ദനങ്ങൾക്കും നന്ദി പറയുന്നു. തന്റെ എക്കാലത്തെയും പിന്തുണയും സന്തോഷവുമായ അമ്മയിൽ അഭിമാനിക്കുന്നതായി പ്രഗ്നാനന്ദ പ്രതികരിച്ചു.
ദിവസങ്ങൾക്ക് മുമ്പ് സമാപിച്ച ലോകകപ്പ് ചെസിൽ ഫൈനലിസ്റ്റാണ് പ്രഗ്നാനന്ദ. കലാശപ്പോരിൽ മാഗ്നസ് കാൾസനോടാണ് ഇന്ത്യൻ താരത്തിന്റെ തോൽവി. ആദ്യ രണ്ട് ക്ലാസിക് ഗെയിമുകളിലും മത്സരഫലം സമനില ആയിരുന്നു. എന്നാൽ റാപ്പിഡ് ഗെയിംസിൽ ആദ്യ മത്സരം കാൾസൺ ജയിച്ചു. രണ്ടാം ഗെയിം സമനില ആയതോടെ കാൾസൻ കിരീടം നേടുകയായിരുന്നു.
2024 ഏപ്രിൽ രണ്ട് മുതൽ 25 വരെയാണ് ചെസ് കാൻഡിഡേറ്റ്സ് ടൂർണമെന്റ്. ഇവിടെ വിജയിക്കുന്ന താരത്തിന് ലോക ചെസ് ചാമ്പ്യൻഷിപ്പിൽ പങ്കെടുക്കാം. നിലവിലത്തെ ചാമ്പ്യനുമായാണ് മത്സരം നടക്കുക. 14 ഗെയിമുകൾക്ക് ഒടുവിലാണ് വിജയിയെ കണ്ടെത്തുക.
