Keralafox

ഒരു നാടിനെ മുഴുവൻ തന്റെ ചിരികൊണ്ടു കീഴടക്കിയ നാട്ടുകാരുടെ പ്രിയപ്പെട്ട പുഞ്ചിരി അമ്മച്ചി വിടവാങ്ങി. കാരോട് അമ്പിലിക്കോണം അയിര പറമ്പിൻതോട്ടം വീട്ടിൽ പങ്കജാക്ഷി(പുഞ്ചിരി അമ്മച്ചി-93)യുടെ വേർപാടാണ് നാടിനു നൊമ്പരമായത്.

തിങ്കളാഴ്ചയാണ് വാർധക്യസഹജമായ അസുഖത്തെത്തുടർന്ന് പങ്കജാക്ഷി മരിച്ചത്. അമ്പിലക്കോണത്തെ കൊച്ചുകുട്ടികൾക്കും മുതിർന്നവർക്കും ഏറെ പ്രിയപ്പെട്ട ആളായിരുന്നു പുഞ്ചിരി അമ്മച്ചി. രണ്ടു വർഷം മുൻപ്‌ വീണതിനെത്തുടർന്ന് വീടിനു പുറത്തിറങ്ങാൻ കഴിയാത്ത അവസ്ഥയിലായിരുന്നു. എങ്കിലും എപ്പോഴും ചിരിച്ചുകൊണ്ടുമാത്രം നടന്നിരുന്ന പങ്കജാക്ഷിയുടെ ചിരി കാണുന്നതിനുവേണ്ടി മാത്രം അവരുടെ വീട്ടിൽ നാട്ടുകാർ വൈകീട്ട് ഒത്തുകൂടുന്നതു പതിവായിരുന്നു.

ചിരിച്ചുകൊണ്ടു മാത്രമേ പങ്കജാക്ഷി ഏതുകാര്യവും പറയുമായിരുന്നുള്ളൂ. ദൈവത്തിന്റെ ഇഷ്ടംകൊണ്ടാണ് ചിരിക്കുന്നതെന്നാണ് പങ്കജാക്ഷി തന്റെ ചിരിയുടെ രഹസ്യമായി പറഞ്ഞിരുന്നത്. ആരെക്കണ്ടാലും ചിരിച്ചുകൊണ്ടു വിശേഷങ്ങൾ ചോദിക്കും. അവരെല്ലാം തങ്ങളുടെ വിഷമങ്ങൾ മാറ്റിവച്ച് ആ ചിരിക്കൂട്ടിൽ പങ്കുചേരും.

പങ്കജാക്ഷിയുടെ ഭർത്താവ് യോവോസ് വർഷങ്ങൾക്കു മുൻപ്‌ മരിച്ചു. ഭർത്താവിന്റെ മരണശേഷം ഏറെ കഷ്ടപ്പാടുകൾ സഹിച്ചാണ് മക്കളെ വളർത്തിയത്. പുളിവിറ്റും ഒാലമെടഞ്ഞു വിറ്റുമൊക്കെയായിരുന്നു ഉപജീവനമാർഗം കണ്ടെത്തിയത്. പിന്നീട് ഒരു ദേവാലയത്തിൽ ശുചീകരണജോലികളും ചെയ്തിരുന്നു.

എന്തുപറഞ്ഞാലും ചിരിച്ചുകൊണ്ടു സംസാരിച്ചിരുന്ന പുഞ്ചിരി മുത്തശ്ശിയുടെ ചിരി ഇനി കാണാൻ കഴിയില്ലെന്ന സങ്കടത്തിലാണ് പ്രദേശവാസികൾ.
മക്കൾ: വിൻസെന്റ്, സൗന്ദർരാജ്, മേരി, ശകുന്തള, വസന്ത.മരുമക്കൾ: സുമതി, റാണി, ജപമണി, ഏലിയാസ്, മോഹനൻ.