കുഞ്ഞിന്റെ പേരിടല്‍ ചടങ്ങിനിടെയുള്ള സംഘര്‍ഷം; കുട്ടിയുടെ അച്ഛന്‍ മനസ്സ് തുറക്കുന്നു
കുഞ്ഞിന്റെ പേരിടല്‍ ചടങ്ങിനിടെ പേരിനെ ചൊല്ലി കുഞ്ഞിന്റെ അമ്മയുടേയും അച്ഛന്റേയും വീട്ടുകാര്‍ തമ്മില്‍ അരങ്ങേറിയ സംഘര്‍ഷം സോഷ്യല്‍ മീഡിയയില്‍ വ്യാപകമായി പ്രചരിച്ചിരിക്കുകയാണ്.ആചാരപ്രകാരം കുഞ്ഞിന്റെ പേരിടൽ ചടങ്ങ് നടത്തുന്നതിനിടയിലാണ് അസാധാരണ സംഭവങ്ങൾ അരങ്ങേറിയത്.പിതാവ് കുഞ്ഞിന്റെ കാതില്‍ അലംകൃത എന്ന പേര് വിളിക്കുമ്പോള്‍ അത് ഇഷ്ടപ്പെടാതെ അമ്മ കുഞ്ഞിനെ പിടിച്ച് വാങ്ങി നയമിക എന്ന പേര് ഉച്ചത്തില്‍ വിളിക്കുന്നത് വീഡിയോയില്‍ കാണാം.കൊല്ലം ജില്ലയിലെ പുനലൂരിലാണ് നാടകീയ രംഗങ്ങൾ അരങ്ങേറിയത്.ഇതിനെക്കുറിച്ച് കുഞ്ഞിന്റെ പിതാവ് പ്രദീപ് ഒരു മാധ്യമത്തിന് മുന്നില്‍ സംസാരിച്ചിരിക്കുകയാണ്‌.
”വിഡിയോയിൽ പ്രചരിക്കുന്നത് പോലെ കുഞ്ഞിന് അലംകൃത എന്ന പേരിട്ടത് എന്റെ സഹോദരിയല്ല. ഞാൻ തന്നെയാണ്.ആശുപത്രിയിൽവെച്ച് എന്നോട് ചോദിക്കാതെ ഭാര്യയും സഹോദരനും കൂടി ജനനസർട്ടിഫിക്കറ്റ് റജിസ്റ്റർ ചെയ്യാനുള്ള പേപ്പറിൽ നയമിക എന്ന് എഴുതികൊടുത്തിരുന്നു.എന്നോട് ഒരു വാക്ക് ചോദിക്കാതെ ചെയ്തത് കൊണ്ട് പേരിടുന്ന സമയത്ത് ഞാനും ഭാര്യയുടെ അഭിപ്രായം ചോദിച്ചില്ല.പേരിടൽ ചടങ്ങിന്റെ അന്ന് സംഭവിച്ച കാര്യങ്ങൾ ആരോ വിഡിയോ പകർത്തി വൈറലാക്കിയതോടെ ചെറിയൊരു കുടുംബപ്രശ്നം വഷളാകുകയാണ് ചെയ്തത്.
ഞാനും ഭാര്യയും തമ്മിൽ എല്ലാ കുടുംബങ്ങളിലും ഉള്ളതുപോലെയുള്ള ചെറിയ അഭിപ്രായ വ്യത്യാസങ്ങളും വഴക്കുകളും മാത്രമേയുള്ളൂ. അതല്ലാതെ വലിയ പ്രശ്നങ്ങളില്ല. എന്നാൽ വിഡിയോ വൈറലാക്കിയത് എന്റെ വീട്ടുകാരാണെന്ന്ആരോപിച്ച് ഭാര്യയുടെ വീട്ടുകാർ ഇല്ലാത്ത ആരോപണങ്ങളാണ് പറഞ്ഞു നടക്കുന്നത്. ഞാൻ ഭാര്യയെ സ്ത്രീധനത്തിനായി പീഡിപ്പിച്ചിട്ടില്ല. അത് വസ്തുതാവിരുദ്ധമായ ആരോപണമാണ്. വിവാഹസമയത്ത് സ്ത്രീധനം ചോദിച്ചിട്ടുമില്ല.എന്റെ കുടുംബത്തിലെ പ്രശ്നം ഈ രീതിയിൽ വൈറലാക്കാൻ ഞാൻ കൂട്ടുനിൽക്കുമെന്ന് തോന്നുന്നുണ്ടോ? എനിക്ക് എന്റെ കുഞ്ഞിന്റെ ഭാവിയെക്കുറിച്ച് ചിന്തിക്കേണ്ടേ?
